香港大水缸
小時候，標榜傳統智慧的故事，通常都匪夷所思，而且滲少少寒氣，溫水煮蛙，可算是箇中的高手。
好地地一隻青蛙，靈巧而敏捷，就算在明澈的月滿之夜，在草叢中生擒一隻半隻，無食過夜粥的，都幾Lei hea。
偏偏，青蛙先生英名一朝喪。唔小心掉落半滿水的鑊，配以文火慢煎，就算你開住蓋，佢都硬係唔知要跳番出來，直至氣絕，依然死得不明不白。
******
生於八十加的你，個口無含鎖匙的，可能都住過十一呎高樓底的舊樓，玩下手，可能還有騎樓／花園／禾塘任擇其一，每晚，阿媽叫你去收晒了整天陽光的衫，得閒又可出去走廊同隔籬屋明仔踼下西瓜波．．．．．．
那間屋，宜家可能一百萬有找，但勝在貨真價實，一呎就一呎。
不過，一柱擎天、羅生門、大地在我腳下之類豪宅唔好講，只要好似小弟咁，掟過二三百萬出嚟買過下新樓，就會發現，香港的青蛙真係好common。
以下是小弟同阿媽的對話：
我：痴線，建築面積九百呎，睇落去同以前四百呎屋差唔多大。
媽：係咁架啦，啲新樓間間都係咁，都夠住啦，叫你喺度打乒乓波咩。
我：頂，個窗台成張床咁大，呃晒啲位。
媽：有窗台咪重靚，唔通成日好似以前啲咁咩，要進步嘛。
我：咁啲衫晒邊，都無預你掛衫既
媽：送左乾衣機，唔俾你晒衫都正常啦．．．．．．．
shit!
仆你班發展商個臭街，咩幾十萬呎平台，六星級酒店會所，你好企定同我解釋下咩叫實用面積，點解九百呎的屋實用面積得五百幾?痴能線，衫唔係掛出窗，唔同擺係廁所吽臭啊，要咁大個窗台把托啊，間房擺得床嚟擺唔到書架，豪宅你條毛!!!!!!!!!
令人費解的係，最fundamental的問題，無人有異議，無人想反抗，如我阿媽阿爸含辛茹苦捱大三個豆丁，儲筆錢換樓，竟然都無被人坤的感覺，唔通新樓真係大晒?進步一定係咁?呃秤呃到上心口，個個當無事發生。大佬，唔係發展商夾計，煮啲屎埋嚟都當魚翅食下。
sorry，我重有知覺，好想跳番出個水煲外面。
Sunday, May 21, 2006
Subscribe to:
Posts (Atom)
